✨來自幹事 (小薯2號) 的感言✨

大家好❤️❤️ 我係幹事小薯二號。

​首先真係好感激大家！自從月初兔協公布面臨財政危機之後，無論係金錢上嘅慷慨捐款，定係行動上嘅支持同打氣，大家都畀咗好大嘅支持我哋。在短短2個星期已籌到超過200萬，真係好感恩，我代表所有兔兔，同大家講聲最深切嘅多謝！🙏🙏🙏🙏

​趁住呢個機會，我都想分享吓喺兔協做咗十幾年義工嘅心底話。

​經常有人問我：「接收過咁多個案，有邊啲令你最深刻？」老實講，每一個都深刻，每一個都令我哋肉痛，每一個都令我哋好嬲。​

見過又黑又綠嘅膿液，膿瘡大過粒波子，侵蝕到下顎骨喺 X-ray 睇落只剩低幼幼一條顎骨支撐住；

見過畀流浪動物攻擊後，後腳傷口嚴重感染；

見過啲膿瘡感染到牙根爛晒；

見過因為主人無錢，兔兔明明已經側頭、反肚、發燒，都堅持唔肯醫……

又見過因為家居意外搞到下顎骨折，然後主人就選擇放棄……

下刪無數令人心碎嘅個案。

​每次收到呢啲個案，無論係職員定義工，整個資源中心同埋我哋嘅 whatsapp 群組，都會充斥住無比嘅憤怒同心痛。

​但係……

​當你見到因為被人類拖延醫治嘅兔兔，竟然完全無對人類失去信任，只要你一伸手摸吓佢個頭，你摸幾耐，佢就想你摸得更耐。

​因為小主人財政問題而任由膿瘡生長嘅兔兔，喺做完手術、啱啱清理完傷口最痛嘅時候，都會大啖大啖咁食晒所有嘢。

​因為流浪感染，醫生將皮膚拉到最盡縫合、最後失去一隻腳嘅兔兔，連醫生都話未必生存到，康復之後，竟然跑得快過好多健全嘅兔。

​因為患有嚴重心臟病，被醫生判定過唔到半年嘅兔兔，喺特別設計嘅醫療籠同治療之下，開開心心咁活多咗好幾年（仲要最鍾意就係食！）。

​每隻兔兔都好努力咁活下去，佢哋強韌嘅生命力，正正就係兔協所有人用心照顧佢哋嘅最大動力。而​我哋成班人，就算識「光合作用」，識「用愛發電」，但偏偏就係唔識「生錢」，諗落都覺得自己真係好失敗。​不過，好彩有你哋每一位嘅大愛！再次衷心多謝社會各界嘅公開支持同埋每一筆寶貴嘅捐款，係你哋嘅力量令到我哋可以繼續撐落去，令一班兔兔唔使失去依靠。

​兔協承諾大家，未來我哋一定會繼續努力，堅守「以兔為先」嘅宗旨，盡全力去救治同照顧每一位毛孩，為佢哋爭取活下去同得到幸福嘅機會。再一次多謝大家！🐰💖

請繼續支持兔協醫療基金眾籌

https://fundraising2026.hkrabbit.org